ДАБААН №1

“Үөрэх баар бараммат баай”

 

 

Наахара орто оскуолатын үөрэнээччилэрин хаһыата.

        Наахара орто оскуолатыгар саҥа үөрэх дьыла үлэтин саҕалаата. Быйыл уратыта диэн оскуола-сад диэн ааттанан үлэ саҕаланна. Быйыл бастакы кылааска 8 оҕо үөрэнэ киирдэ, биэс саҥа учуутал үлэлии кэллэ: Турантаева Р,В. нуучча тылын уонна литературатын учуутала, 7 кылаас салайааччыта, Сивцева И.Е.-нуучча тылын уонна литературатын учуутала, 5 кылаас салайааччыта, Федорова И.Ф.-математика учуутала, Барашкова Т.Д. –алын сүһүөх учуутала, 1 кылаас салайааччыта,Захаров Н.В.- физкультура учуутала.

Оскуолабыт гражданскай-патриотическай хайысханан үлэлиир. Хас биирдии оҕо бөҕө туруктаах, билиилээх буолан тахсарыгар иитии үлэтэ барар. Балаҕан ыйын 1 күнүттэн саҕалаан, араас тэрээһиннэр ыытылыннылар: “Билии күнэ”,  “Күһүн көмүс алыба”, “Доруобуйа күнэ”,оскуола лидерын талыы быыбара буолла. «Күһүн көмүс алыба»тэрээһиҥҥэ кылаас барыта сүрдээх тэрээһиннээхтик кытыннылар, оҕуруот аһыттан дьикти дьиибэ бүлүүдэ,  “Саамай улахан ”уонна “Саамай кыра” сүбүөкүлэ диэн куонкурустар ыытылыннылар.


Үөрэх дьылын бастакы ыйа олус ситиһиилээх даҕаны, интэриэһинэй да буолла. Ол курдук, оҕолор улууска уонна республикаҕа ыытыллар күрэхтэргэ ситиһиилээхтик кыттан, оскуолабыт аатын ааттаттылар: улууска ыытыллыбыт сүүрүү күрэҕэр Соколов Сокол 1000 км. бастаата, тренер –Петров М.В., Никаноров Валера Анапаҕа ыытыллыбыт Россия чемпионатыгар чемпион 


үрдүк аатын ылла, тренер –Петров М.В. Балаҕан ыйын бүтүүтүгэр Дьокуускай куоракка ыытыллыбыт Дьокуускай куорат мас тардыһыытыгар аһаҕас турнирыгар Васильев Коля 68 кг. Никаноров Валера 52 кг. бастаатылар.

   Оҕолор үөрэҕи таһынан үлэҕэ эмиэ көхтөөхтүк кытыннылар. Көҕөрдүү үлэтэ ыытылынна. Оҕо площадкатыгар 100 маһы түөрэн аҕалан олортубут. Герой ийэ Васильева П.К. уонна инвалид Куприянов В.Н. тимуровскай үлэҕэ сылдьан мас саһааннаатыбыт.

 

       Балаҕан ыйын 3-4 күннэригэр Томторго “Сайдыс ” лааҕыр   базатыгар оҕо түмсүүтүн слета ыытылынна. Манна биһиги оскуолаттан соц. педагог Сидорова С.П. 7 оҕону илдьэ сырытта. Барыта бу слекка 275 оҕо кытынна. Нам улууһуттан   “Ылдьаа ыччаттара” түмсүү сүрүн ыалдьыт буолла. Оҕолор икки күн устата араас куонкурустарга кытыннылар, эбии үөрэхтэргэ үөрэннилэр, үгүс элбэх доҕордоннулар.

Быйыл биһиги нэһилиэкпит 380 сылыгар анаан оскуола дьаһалтата “Наахарам ытык сирдэрэ”    диэн ааттаан историческай-документальнай киинэни уста сылдьар. Киинэҕэ нэһилиэкпит ытык сирдэрэ сырдатыллар. Киинэ алтынньы ыйга тахсара былааннанар.

 

      


Биир улахан тэрээһининэн оскуолабыт лидерин талыы буолла. Григорьев Валера 8 кылаас, Тимофеева Ира 9 кылаас уонна Сивцева Наташа 9 кылаас кандидатынан турдулар. Быыбарга барыта 69 быыбардааччы кытынна. Түмүккэ Григорьев Валера 45 куолаһы ылан, оскуолабыт лидеринэн талылынна, Тимофеева Ира көмөлөһөөчүнэн ананна.

     Балаҕан ыйын 29 күнүгэр төрөппүт уопсай мунньаҕа ыытылынна. Төрөппүт түмсүүтүн бэрэссэдээтэлэ Попова Л.К. сыллааҕы улэни отчуоттаата. Отчуоту истэн баран үчүгэйинэн сыаналаатылар. Быйылгы үөрэх дьылыгар Гаврильева Л.П. биир санаанан  төрөппүт комитетын салайааччытынан таллылар. 

      Хас биирдии киһиэхэ саамай күндүтэ доруобуйа буолар. Бу күннэргэ Майаттан быраастар тахсан үөрэнээччилэргэ диспанцеризация ыыттылар. Бу нэдиэлэттэн хас сарсыарда үөрэх иннинэ чэбдигирдэр хамсаныыны, сэрээккэ оҥорууну, саҕалаатыбыт.

    Дьэ, ити курдук, быйылгы үөрэх дьылын бастакы ыйа түмүктэннэ. Иннибитигэр өссө интэриэһинэй үөрэх-билии аартыга тыргыллар.

 

 

    Сайыммыт барахсан сылааһынан илгийэн, дьэдьэнинэн күндүлээн, кэлэн ааһа оҕуста. Оҕолор сайыҥҥы сынньалаҥнарын хайдах атаарбыттарын билээри, көрсөн тэттик ыйытыыбытыгар эппиэттииллэригэр көрдөстүбүт.

Коля Васильев

Мин быйыл сайын Азия оҕолоро оонньууга күрэхтэстим. Чемпион үрдүк аатын ылан Сахам сирин, улууһум уонна төрөөбүт нэһилиэгим аатын түһэн биэрбэтим. Үгүс элбэх доҕордоннум. Олус интэриэһинэй сайын буолан ааста.

Ира Тимофеева

Мин бэс ыйын 15-28 күннэригэр “Сайдыс”  лааҕырга сынньанным. Үгүс элбэх саҥаны, интэриэһинэйи биллим, сайынным, элбэх дьүөгэлэнним.

Лера Куприянова

Сайыҥҥы сынньалаҥмын олус үчүгэйдик атаардым. Хаҥалас улууһун “Ленскэй кыраай”лааҕырга сынньаммытым олус үчүгэй өйдөбүлү хаалларда. Лааҕырбытыгар республика араас улуустарыттан оҕолор кэлэн,эбии үөрэххэ дьарыктаннылар. Мин ордук английскай тыл үөрэҕэр дьаныһан туран сырыттым.

 

Алина Куприянова

Мин ийэм төрөөбүт дойдутугар Ытык Күөлгэ “Звездочки” үҥкүү лааҕырыгар сырыттым. Олус элбэх үҥкүү үөрэттилэр. Суруйааччылар музейдарыгар сылдьыбыппыт уонна түмүккэ төрөппүттэрбитигэр кэнсиэрдээн үөрдүбүппүт.


Күндү ааҕааччыларбыт!

        Эн илиигэр биһиги бэйэбит таҥан таһаарбыт бастакы хаһыаппытын тутан олороҕун. Бу биһиги бастакы саҕалааһыммыт буолар. Хаһыаппытын инникигэ, үрдүккэ дабайар үктэллэр диэнтэн  “Дабаан”диэн ааттаатыбыт. Хаһыат ыйга иккитэ тахсыаҕа. Саҥаттан саҥа сибиэһэй сонуннары сырдата туруохпут. Инникитин эбии эҕэрдэлэри, толкуйдатар таайбараҥнары таһаарар былааннаахпыт.

 

       Эйигиттэн эбии тугу киллэрэбит, ааҕааччыга күүтүүлээх буоларын инниттэн хаһыаппытын хайдах тупсарыахха сөбүй диэн ыйытыыларга сүбэлэри эрэнэ күүтэбит.